وقف نشر تدوينات عن العلوم و الكون مؤقتا

سأتوقف بمشيئة الله تعالى عن نشر تدوينات عن الكون والعلوم مؤقتا والاتجاه الى شيء من التغيير قليلا حتى لا يمل قراء المدونة الاعزاء

كلنا عارفين إن السنة الكبيسة تقريبا 366 يوم...تتكرر كل 4 سنوات...لماذا؟

31- كلنا عارفين إن السنة الكبيسة تقريبا 366 يوم...تتكرر كل 4 سنوات...لماذا؟
كلنا عارفين إن At Noon بالإنجليزية معناها وقت الظهيرة...يعنى الساعة 12 ...فى حين إن NOON دى تحريف لكلمة Nine اللى معناها التاسعة!!!
إيه اللغبطة دى!!
يا ترى إيه حكاية حساب الوقت الملغبط ده؟

قبل إختراع الساعات كان الناس يعرفون الوقت من ساعات مثبته على برج الكنيسة تدق كل ساعة معلنة الوقت! ومن هنا جاء اسم الساعة CLOCK إنها مشتقة من الكلمة الفرنسية CLOCHE وتعنى جرس!!
- ولكن الناس عرفوا قديما أن النجوم تتحرك بإنتظام فى السماء!ويمكن للمرء تحديد الوقت تبعا لحركتها!
- إذا أشار المرء بإصبعه فوق رأسه مباشرة فإنه يشير إلى السمت ZENITH وهى كلمة عربية معناها فوق الرأس مباشرة!وإذا مد ذراعه شمالا وجنوبا مرورا بالسمت فسيرسم خطا وهميا بالسماء يقطعها نصفين بالظبط! هذا الخط اسمه خط الزوال MERIDIAN وهى كلمة لاتينية تعنى منتصف النهار!
وسبب التسمية أن أى جرم سماوى يتحرك فى القبة السماوية من الشرق إلى الغرب يقطع خط الزوال تماما فى منتصف الطريق!
أى لو قيسنا لحظة مرور نجم ما بخط الزوال فى ليالى متتالية لكانت الفوارق الزمنية متطابقة بشكل مذهل!

لماذا لا نقيس الفواصل بين لحظات الشروق والغروب؟
خط الأفق عادة لا يكون منتظم! فعادة ما يحجبه الضباب أو السراب بالإضافة إلى إنعكاس الضوء وإنكساره!
لذلك كلما علت الأجرام فى السماء كانت أيسر وأدق فى رصدها

- يطلق على الفاصل الزمنى بين لحظتى زوال فى ليلتين متتاليتين لنجم ما باليوم النجمى SIDEREAL DAY وهى مستمدة من كلمة لاتينية بمعنى برج أو نجم!
وهو مدة دوران الأرض حول نفسها دورة كاملة بالنسبة للنجوم! أى للكون بشكل عام

- لو ثبتنا عمودا على الأرض فإنه يلقى بظل طويل نحو الغرب عند شروق الشمس! وكلما ارتفعت الشمس فى السماء كلما قصر الظل واتجه نحو الشمال!
حتى إذا انتصف النهار بلغ الظل حده الأدنى!وعاود رحلة الإستطالة ولكن نحو الشرق!حتى يبلغ طوله الأدنى لحظة الغروب!!
يطلق على هذا العمود GENOMON وهى كلمة يونانية تعنى الآن!!
وقد استغل الناس قديما هذه الظاهرة وابتكروا جهازا لقياس الوقت!
وقسموا الدائرة الناتجة عن الظل إلى 12 قسم!!

ولكن لماذا 12 قسم؟
- قد يكون لسهولة التعامل مع الرقم 12 والذى يقبل القسمة على 2و3و4و6 بدون كسور!
- قد يكون أيضا تيمنا بدائرة البروج(12 برج) فمعظم الحضارات القديمة عبدت الشمس!

- لقد كان شروق الشمس هو الساعة الأولى من النهار!
ولذلك فالتوراة عندما تتحدث عن الساعة 11 فالمقصود الحادية عشر بعد الشروق(أى قبل الغروب بساعة)! ولا علاقى لذلك ب11ص أو 11 م بمفهومنا الحالى!!
- أما كلمة NOON (وتعنى الظهر بمفهومنا الحالى) فهى كلمة يونانية محرفة من NINE وتعنى الساعة التاسعة من الشروق!(أى ثلاث أرباع النهار) وهو وقت الغذاء!
ولكن إرتباط الكلمة بالطعام كان أقوى من إرتباطها بالوقت!
فعندما تغير موعد الغذاء إلى فترة منتصف النهار(أى الساعة السادسة من الشروق) ظل الإسم كما هو!!
ولذلك فنحن نقول قبل الظهر AM أى ANTEMERIDIAN
نقول بعد الظهر PM أى POSTMERIDIAN

- ومادام النهار قسم إلى 12 ساعة فاليل أيضا قسم 12 ساعة!
- ولكن النهار يطول ويقصر خلال نصف العام وتنعكس الآية خلال النصف الثانى من العام وينطبق ذلك على كل بقعة على الأرض بإستثناء خط الإستواء!(ولذلك سمى أصلا خط إستواء حيث يستوى الليل والنهار)

- وكلما بعدنا عن خط الإستواء شمالا وجنوبا كانت فوارق التغير أكبر!
حتى نصل للقطبين فنجد أطول ليل (6 شهور) وأطول نهار (6 شهور)!
وبالطبع كانت الساعات الرملية والمائية أو الشموع المحترقى هى التى تستخدم لقياس ساعات الليل.
- غير أنه يكاد يكون من المستحيل إبتكار ساعات تقيس وقت يطول ويقصر على مدار العام!
ولذلك اتفق على أن يقسم اليوم إلى 24 ساعة متساوية!!

ولكن من أين يبدأ اليوم؟
كان من الطبيعى أن يفكر الناس أن يبدأ اليوم مع شروق الشمس!
أو أن ينتهى اليوم مع غروب الشمس ويبدأ اليوم الجديد بعد الغروب مباشرة!!
واتفق معظم العالم أن يبدأ اليوم مع الشروق!
ولكن بعض الشعوب ومنها اليهود ولسبب دينى يبدأ يومهم من الغروب!ولذلك فالسبت اليهودى يبدأ من غروب شمس الجمعة!

-ولكن وكما اتفقنا سابقا! فحساب اليوم من الشروق للشروق أو من الغروب للغروب يحدث إرباكا لعلماء الفلك!
ولذلك فهم إحتسبوا اليوم من الزوال للزوال!!
(أى من منتصف الليل لمنتصف الليل ومن منتصف النهار لمنتصف النهار)
ومن غير المنطقى أن يبدأ اليوم بالطبع من منتصف النهار!فهذا يحدث إرباك للمعاملات!فوقع الإختيار على منتصف الليل كبداية لليوم الجديد!!

-وبدلا من أن يتحول اليوم إلى 12 ساعة من النهار و12 ساعة من الليل!
تحول إلى فترتين!كلا منهما تحتوى ساعات الليل والنهار معا!
وتحولت كلمة NOON والتى كانت تطلق على التاسعة! ثم السادسة!إلى منتصف النهار!!!
لقد صار الوقت فى غير موعده

- لقد تم تقسيم اليوم إلى 24 ساعة بالظبط! واليوم النجمى مدته 23 ساعة 56 دقيقة و4 ثوانى!!
ما سبب هذا الفارق بين اليوم النجمى واليوم الشمسى؟؟؟؟؟؟؟؟؟؟
- أليست الدورة اليومية التى تقطعها الأرض(بالدوران حول نفسها) متساوية بالنسبة للنجوم والشمس؟!
- الإجابة لا هناك فرق!!
-فالأرض لا تدور حول نفسها فقط! بل تدور حول الشمس أيضا فى مدار مسافته 186 مليون ميل!ولو كان هذا الرقم فى تخيلكم ضخما!!
إلا أنه يعتبر نقطة إذا ما قورن بأقرب نجم!
ولذلك فموقع الأرض ثابت بالنسبة للنجوم واليوم النجمى ثابت!
أما بالنسبة للشمس فهى أقرب كثيرا من النجوم!

- تستكمل الأرض دورتها حول الشمس كل 365.2422 يوم وذلك يعنى أن الأرض كلما أتمت دورة حول نفسها بالنسبة للنجوم!تكون قد تحركت جزء طفيف حول الشمس!ولذلك لا بد أن تدور جزء إضافى حول نفسها لتعود لنفس الوضع الذى كانت عليه اليوم السابق!
هذا الجزء الإضافى قدره 3 دقائق و 56 ثانية!!
(إنه الفارق بين اليوم الشمسى والنجمى!)
ويتراكم هذا الفارق لمدة أربع سنوات لينشأ عنه يوم كامل فرق ويتم إضافة هذا اليوم كل 4 سنوات فى السنة الكبيسة!

ولكن مهلا!!
 
كل اللى قلنا فوق ده لو كان مدار الأرض حول الشمس بالظبط 186 مليون ميل(يعنى دائرى) وبالطبع كل أعضاء المنتدى الأذكياء عارفين إن المدار بيضاوى!!وكمان لو الأرض قريبة من الشمس تمشى أسرع ولو بعيدة تمشى أبطأ زى مكبلر علمنا!

- يبقى لما الأرض تلف حول الشمس بسرعة أكبر!حتوصل بدرى لنفس النقطة!وحتحتاج وقت إضافى فى دورانها حول الشمس علشان اليوم يكمل!!
الله يبقى كده اليوم أطول!(وده بيحصل فى الصيف)
ولما الأرض تلف حول الشمس بسرعة أبطأ!توصل متأخرة لنفس النقطة ويبقى اليوم أقصر!(وده بيحصل فى الشتاء)

- وفيه سبب تانى لإختلاف الزوال الشمسى!هو إن ميل محور الأرض 23.5 درجة!
يعنى فى الإعتدالين الربيعى والخريفى(زاوية الميل بتتقاطع مع خط استواء مدار الأرض) وفى الإنقلابين الصيفى والشتوى( مدار الأرض موازى لخط الإستواء) وده بيأثر بفروق طفيفة على الزوال!

- دلوقتى بقى لو كل بلد ظبطت وقتها حسب زوال الشمس المحلى الدنيا حتتلخبط طبعا!!
عشان كده العلماء قسموا الكرة الأرضية بخطوط طول وشرائح وقت! لكل شريحة نفس الوقت لتسهيل المعاملات!
يعنى الأرض فيها 360 خط طول الشمس بتقطع كل خط فى 4 دقايق!يعنى 1440 دقيقة يعنى يوم!!
يعنى مثلا القاهرة على خط عرض 31 يبقى الفرق بينها وبين جرينتش 31*4= 124 دقيقة! يعنى ساعتين وأربع دقايق!(ده الكلام العلمى الفلكى)
إنما فى تقسيم شرائح الوقت بيحطوا مصر بكاملها فى الشريحة اللى تسبق جرينتش بساعتين!!

طب ليه مصر بتغير التوقيت بين الصيف والشتاء؟
قولنا إن الصيف نهاره أطول!
يعنى الناس بتنام فترة طويلة بعد الشروق!
وبكده بيسهروا لوقت طويل قوى بعد الغروب!
يعنى بيستهلكوا طاقة بشكل أكبر!
يبقى كده نحاول نقصر الوقت اللى الناس بتسهر فيه شوية!!علشان نقلل إستهلاك الطاقة! بإننا نغير الساعة

لماذا يغطى قرص القمر قرص الشمس بالكامل فى حالة الكسوف الكلى؟

30- بمناسبة الكسوف الكلى للشمس...سؤال بسيط جدا
لماذا يغطى قرص القمر قرص الشمس بالكامل فى حالة الكسوف الكلى؟

الجميع يعلم حالة الكسوف الكلى للشمس عندما يغطى قرص القمر كل قرص الشمس بالتمام فيتحول النهار إلى ظلام دامس
هو قطر الشمس تقريبا أكبر من قطر القمر بنحو 375 مرة
والمصادفة العجيبة
إن الشمس تقع تقريبا على بعد375 مرة مثل بعد القمر!!

ولهذا السبب فالقمر البدر قرصه مساوى تماما لقرص الشمس
والقيمة 4 بالزوايا القوسية
فعندما ينطبق قرصى الشمس والقمر فى حالة الكسوف الكلى تختفى الشمس تماما ولا يظهر منها غير الإكليل الشمسى

ولكن هذا السؤال يقودنا لملاحظة فلكية لطيفة
الشمس تكون فى مواجهة النصف الشمالى للأرض فى فصل الصيف
حيث ميل محور الأرض يشيرنحو الشمس

فى حين إنه فى الشتاء الشمالى يكون ميل محور الأرض مبتعدا عن الشمس

هذا يقودنا إلى نتيجة مباشرة
قرص الشمس فى فصل الشتاء أكبر منه قليلا عن قرص الشمس فى فصل الصيف!!
فى حين أن قرص القمر حجمه لا يتأثر
فلوحدث كسوف ما فى خط عرض ما فى الشتاء...سوف يستغرق وقتا أطول فى فصل الشتاء عنه فى فصل الصيف!!

مع إن الشمس بنفس حجمها والقمر بنفس حجمه!
الفكرة فى التأثير الظاهرى المخادع لكبر قرص الشمس فى الشتاء!

ملاحظة أخيرة!!
القمر يبتعد سنويا عن الأرض بنحو من 3-4 سم
إذن فى خلال مئات السنين
سيكون قرص القمر أقل بكثير من حجمه الآن
ولن نر كسوفا كليا للشمس أبدا!!

علينا الآن إذن التمتع بهذه الظاهرة الفريدة قبل أن يفوتها علينا الزمن

هل يمكن أن يطيرالبشر من الأرض إذا توقفت فجأة عن الدوران؟

29- هل يمكن أن يطيرالبشر من الأرض إذا توقفت فجأة عن الدوران؟

السلام عليكم ورحمة الله وبركاته
سؤال جال بخاطرى
ترى ما هى سرعة الأرض المفترضة بحيث ما أن تتوقف..يعمل القصور الذاتى على قذف البشر خارجها..والتغلب على الجاذبية؟

الفكرة ببساطة أن راكب الأرجوحة الدوراة قد يفلت منها ويقع إذا ما توقفت فجأة والسبب هو قصوره الذاتى...بمعنى أن جسمه سيكتسب سرعة خطية هى نفسها السرعة النهائية قبل أن تتوقف الأرجوحة بشكل مباشر

فبحسب قانون نيوتن للحركة الأول...يبقى الجسم محافظا على حالته من السكون أو الحركة مالم تؤثر عليه قوة خارجية

الآن نعود لأرجوحتنا....الكرة الأرضية!!
فهى تدور حول نفسها فى إتجاه عكس عقارب الساعة بسرعة 465 متر/ثانية
هذا عند خط الإستواء....وتقل السرعة مع تغير خطوط العرض

وتدور حول الشمس فى نفس الإتجاه (عكس عقارب الساعة ) بسرعة 30 كم /ثانية
فتكون المحصلة الكلية لسرعة أيا منا 30465 متر/ثانية
(طبعا إحنا بنجمع السرعة لو كنا فى النصف الغير مواجه للشمس..ليل يعنى
أما فى النصف النهارى المواجه للشمس المحصلة الكلية 30000-465 يعنى 29535 متر فى الثانية)

طيب الأرض سرعة إفلات الصاروخ منها حتى يتحرر من جاذبيتها تبلغ 11000متر فى الثانية

يبقى لو الأرض توقفت فجأة
حيكون سرعة البشر فى القسم النهارى من الأرض 29535
وسرعتهم فى النصف الليلى 30465
الرقم الأول=2.7 مرة ضعف سرعة الإفلات
والثانى =2.8 مرة تقريبا

يبقى فى كل الأحوال الأرض لو وقفت فجأة كلنا حنطير وحنفلت من مجال جاذبيتها بسهولة

يبقى على الأرض إنها تقلل سرعتها الكلية بنسبة 3 مرات أقل حتى تحافظ على البشر عليها بإستمرار

بقى إشارة واحدة هى إن الحركات كلها فى الموضوع منسوبة لوضع الأرض بالنسبة للشمس
أما لو نسبنا الحركات مثلا لكوكب زحل الأرقام تختلف تماما
ولكن هناك شئ هام جدا جدا!!
مبـــــــــــــدأ الأرجوحة!!
فالأرض حركتها حول زحل إرتدادية وليست دورانية

لو وزنك عند القطب الشمالى = 500 كيلو يا ترى عند خط الإستواء حيكون كام؟

28- سؤال خفيف جدا....
لو وزنك عند القطب الشمالى = 500 كيلو
يا ترى عند خط الإستواء حيكون كام؟

هو بما إن الوزن معناه محصلة ضرب الكتلة فى عجلة الجازبية
طيب الكتلة ثابتة...إنما عجلة الجازبية تتغير من مكان لمكان بحسب خطوط العرض

يعنى عند القطب (وبما إن الأرض منبعجة)
الشخص يكون أكثر قربا من مركز الأرض ويقع عليه شد لأسفل (وزن يعنى) بقدر أكبر

بسبب التأثير ده وزن الواحد ممكن يزيد عند القطب تقريبا 1/200 من قيمته

إنما فى تأثير تانى جميل أيضا
بما إن الأرض ليست ثابتة...يعنى تدور حول نفسها
ودورانها عند الإستواء أسرع من دورانها عند القطبين( وده جعل شكلها ليس تام الكروية)
معنى كده إن فيه قوة طرد للأجسام على الأرض تعمل عكس قوة الوزن

يعنى عند حط الإستواء الأرض تطردك للخارج بقدر أكبر

التأثير ده يجعل وزن الإنسان يقل 1/300 من قيمته عند الإستواء

يبقى المحصلة الكلية 1/500
يعنى الفيل الأفريقى لو وزنه 499 كجم فى غابات أفريقيا
عند نقله لسهول سيبيريا حيكون وزنه 500 كجم

فى أمان الله

كيف يمكن حساب كتلة الأرض؟

27- كيف يمكن حساب كتلة الأرض؟

السلام عليكم ورحمة الله وبركاته
سؤال خفيف وأعتقد أن له إجابات عديدة ولكن تحضرنى الآن تلك الإجابة فقط!
كل شئ فى الكون له كتلة...لابد له قوة جازبية ما..وتعتمد شدة الجازبية على كتلة الجسم...يعنى كلما زادت كتلته زادت قدرته على جزب ما حوله
يبقى ممكن ببساطة نضع قمر صناعى ما فى مدار حول الأرض وبحساب المسافة بين مركزى الأرض والقمر الصناعى نحسب كتلة الأرض!!
(تطبيق مباشر لقانون التربيع العكسى لنيوتن)

ومن المعروف فى حالات السقوط الحر إن أى جسم يسقط على الأرض يتسارع بمعدل تقريبا 9.8 متر لكل ثانية
بس في حاجة مهمة جدا
التسارع ده محسوب تقريبا عند مستوى سطح البحر!

يعنى لو أنا على قمة إفرست وألقيت بكتلة ما...التسارع يقل قليلا عن 9.8 متر لكل ثانية....والسبب إن قوة الجازبية بتضعف مع زيادة البعد عن مركز الجسم

طيب السؤال هنا:
ياترى كل الأجسام تخضع لنفس التغير فى معدل التسارع؟

يعنى أنا لو رميت القمر من قمة إفرست تسارعه حيقل بنفس الدرجة التى يقل بها تسارع قلم جاف مثلا!
الإجابة الأكيدة نعم....الإثنين تسارعهم حيقل بنفس المعدل على رغم إختلاف الكتلة الهائل.

يبقى أنا لو عرفت بعد الجسم عن الأرض...وعرفت تسارع الجسم فى دورانه حول الأرض بسهولة أقدر أحدد كتلة الأرض

والعلماء حسبوا كتلة عطارد بإطلاق قمر صناعى بحثى يدور حوله

الشئ اللى يغيظ بصراحة فى المعادلة إن كتلة القمر الصناعى لاعلاقة لها بالموضوع!!!
المهم معدل تسارعه حول الكوكب

المعادلة:
M=4PI^2*R^3/T^2G
M هى كتلة الكوكب المطلوب حساب كتلته...الثابت يعنى وليست كتلة القمر الصناعى الدوار!
R المسافة بين مركزى القمر الصناعى والكوكب
T تسارع أو عجلة الحركة الدورانية للقمر الصناعى حول الكوكب
G ثابت الجازبية العام لنيوتن!!

الله...طيب إحنا لم نعتمد إطلاقا على كتلة القمر الصناعى فى المعادلة!!

إفرض عايزين نعرف كتلته؟
الواقع العملى بيقول إننا نبعث قمر تانى أصغر فى الحجم يدور حول القمر الصناعى الأول...وقيمة m حينها سوف تؤول إلى كتلة القمر الصناعى-أ وليست كتلة الكوكب المراد حسابه بالأساس

فى أمان الله

هل موجات الجازبية جزء من الطيف الكهرومغناطيسى...بإعتبار الضوء جزء منه؟

26- إحنا بنقول الضوء يقطع 8 دقائق تقريبا من الشمس للأرض....كمان موجات الجازبية تقطع برده 8 دقائق من الشمس للأرض!

هل موجات الجازبية جزء من الطيف الكهرومغناطيسى...بإعتبار الضوء جزء منه؟

الإجابة لا....لاتعتبر موجات الجازبية جزء من الطيف الكهرومغناطيسى على الرغم من التماثل بين قوى الجازبية والقوى الكهرومغناطيسية فى بعض النواحى

من المفترض فى النموزج القياسى للفيزياء النووية يوجد 4 قوى أساسية للمادة
القوى دى لها نواقل خاصة بها...يطلق عليها بوزونات...نسبة للعالم الهندى..ساتيندراناث بوزى
القوى النووية القوية وناقلها الجلونات
القوى النووية الضعيفة ونواقلها جسيمات z-w
القوى الكهرومغناطيسية ونواقلها الفوتونات
كل البوزونات دى تم إكتشافها
المفترض نظريا إن البوزون المسئول عن الجازبية (القوة الرابعة للمادة) اسمه جرافيتون....ولكن حتى الآن فشلت جميع التجارب فى إكتشافه!

طيب لو قارنا بين خصائص الفوتون والجرافيتون
الإتنين متشابهين فيما يلى:
1- ينطلقوا بسرعة الضوء
2- كتلة الثبات لهم = صفر
(ده معناه المباشر إنه لايوجد فوتون أو جرافيتون ثابت)
3- شحنتهم الكهرومغناطيسية= صفر

والإثنين مختلفين فيما يلى
1- قيمة لف الفوتون=1
وقيمة لف الجرافيتون= 2

هنا بقى إختلاف كبير
اللف معناه إن حزمة الضوء عبارة عن تكومات من الفوتونات وممكن تقوية الحزمة الضوئية بزيادة عدد الفوتونات كحزمة الليزر مثلا...ده يتم بسهولة لإن قيمة اللف = 1

أما الجرافيتون...فقيمته 2
ده معناه إن قوة الجزب بين جسيمين نظريا تتحكم فيها حزمة معينة من الجرافيتونات لا يمكن تغييرها
وده كمان معناه إن دايما الجرافيتونات بتشد بعض ولا تتنافر إطلاقا

يعنى لو أردنا نقارن بين قوى الجازبية وباقى الطيف الكهرومغناطيسى نقدر نقول:

1- قوى الجازبية دائما قوى شد...أما الطيف الكهرومغناطيسى فهو إما جسيمات تتجازب أو تتنافر حسب شحنتها

2- كل الجسيمات اللى فى الدنيا تشعر بقوى الجازبية (حاجة غريبة جدا فعلا)
أما الجسيمات المشحونة فقط هى التى تشعر بالقوى الكهرومغناطيسية
علشان كده تلاقى فيه مصطلح اسمه شحنة الجازبية
وشحنة الجازبية دى قيمتها تساوى كتلة الجسم على طاقته!
وبما إن كل جسم فى الوجود له كتلة أو طاقة أو كليهما معا...يبقى لازم له شحنة جازبية...يعنى لازم يحس بالجازبية

3- فوتونات المجال الكهرومغناطيسى تنقل القوى ولاتتفاعل مع بعضها
أما المجال التجازبى فجرافيتوناته...تشد بعضها بعضا والسبب إختلاف قيمة اللف بين الفوتون والجرافيتون

من الشائع إن المشترى يصدر عنه أصوات!! ترى ما السبب فى ذلك؟

25- من الشائع إن المشترى يصدر عنه أصوات!!
ترى ما السبب فى ذلك؟

من الشائع إن كوكب المشترى تصدر عنه موجات راديو وأول ما إكتشفت ذلك كانت المركبة كاسينى Cseini ويعزى علماء ناسا سر هذه الأصوات إلى ظاهرة الأورورا أو الشفق القطبى التى تحدث عند قطبى المشترى

وكانت أول مرة رصدت فيها كاسينى هذه الأصوات فى إبريل 2002 عندما كانت على بعد 374 مليون كيلومتر من الكوكب
وبما إن الترددات فى نطاق موجات الراديو...قامت ناسا بإعادة صياغتها فى نطاق ترددات الصوت العادية حتى يمكن سماعها وكانت النتيجة ذلك:

YouTube Video

الصورة المرفقة مع الملف هى صورة زحل...خطأ مطبعى!!

والسؤال الأهم
مامصدر هذه الموجات؟
أفضل الأجوبة المتاحة إنه بسبب جو المشترى وغلافه الجوى..وبسبب حدوث عواصف كهرومغناطيسية قوية على سطحه...
ينشأ عن ذلك تصادمات بين الجزيئات المشحونة من الرياح الشمسية وغلاف المشترى...وتكون التصادمات أعنف من تلك التى تحدث على الأرض نظرا لجاذبية المشترى...
هذه التصادمات ينشأ عنها موجات فى نطاق أشعة الراديو
ولكنها من الضعف بحيث لم يتح رصدها من الأرض
وإنما رصدتها كاسينى المقتربة من الكوكب

سؤال فلكى هام ما هو الفرق بين بريق النجم وشدة إضاءته؟

24- سؤال فلكى هام
ما هو الفرق بين بريق النجم وشدة إضاءته؟

السلام عليكم ورحمة الله وبركاته
عندما تفتح أى كتاب فلكى كثيرا ما تجد عبارات مثل
بريق النجم كذا يعادل بريق الزهرة...بينما شدة إضاءته تعادل الشعرى اليمانية
فما هو المقصود بالبريق وشدة الإضاءة؟

تعتبر الشمس بفرق شاسع أسطع النجوم فى السماء
درجة بريقها= 26.91-
يليها الشعرى اليمانية
بريقه= 1.42-
ولذلك الفرق بينهما تقريبا على مقياس البريق= 25.49 درجة
ويتم إحتساب كل درجة على إنها الأس المرفوع للرقم 2.512

يبقى كده المفروض بريق الشمس قد الشعرى اليمانية بمقدار
2.512^25.46
حيث 2.512 =الأساس
25.46 = الأس
الرقم يطلع تقريبا 15 بليون!!!

يعنى بريق الشمس قد بريق الشعرى اليمانية 15 بليون مرة!!

بس خدوا بالكم!!
الشمس على بعد 150مليون كيلومتر
والشعرى اليمانية على بعد 2.65 فرسخ نجمى

يبقى الشعرى أبعد من الشمس 530 ألف مرة!!

طيب يا ترى لو حطينا الشمس والشعرى اليمانية على مسافة معيارية (10 فرسخ) بريق كل واحد حيكون كام؟؟
فيه قاعدة إن شدة الإضاءة تقل مع مربع المسافة!

يبقى على بعد 10 فراسخ
الشمس حتبعد مليونى مثل بعدها الحالى!

يبقى إضاءتها حتقل
2مليون*2مليون مرة
يعنى على مقياس البريق حتكون= 4.69

الشعرى اليمانية بقى
مسافته حتزيد 3.75 مرة فقط
يبقى الإضاءة حتقل
3.75*3.75 مرة
وعلى مقياس البريق= 1.3

يبقى على بعد 10 فراسخ الفرق نقول تقريبا 3
يعنى الشعرى اليمانية حيكون أكثر بريقا من الشمس 15 مرة!!
والشمس حتكون نجم متواضع فى المجتمع الفلكى!!

الخلاصة:
البريق:هو شدة إضاءة النجم على مسافته الحالية
شدة الإضاءة:هو بريق النجم لو وضع على مسافة معيارية

وبديهى إن شدة الإضاءة هى ما يهم علماء الفلك
أما البريق فيهم الشعراء والعامة

دمتم بود

الضوء المرئى هل يستطيع إختراق الجدران؟

السلام عليكم ورحمة الله وبركاته
دى صورة الطيف الكهرومغناطيسى....يبدأ من جهة بموجات الراديو ذات الطول الموجى الطويل....ثم يقل الطول الموجى كلما إتجهنا يمينا...مرورا بالميكروويف ثم الأشعة تحت الحمراء ثم الضوء المرئى.....
ثم الأشعة ذات الأطوال الموجية القصيرة
الأشعة الفوق بنفسجية ثم أشعة إكس....وأخيرا أشعة جاما...

فجاما هى أقل أشعة الطيف طولا موجيا...وأعلاها ترددا...وأكثرها طاقة!
طيب فين السؤال!

23- لو كانت أشعة جاما بطاقتها العالية..تستطيع إختراق الجدران..
وكمان أشعة الراديو بطاقتها الضعيفة.....تستطيع إختراق الجدران...
طيب الضوء المرئى بين الإتنين
هل يستطيع إختراق الجدران؟

الإجابة المباشرة طبعا لأ....لإن ببساطة لو أضئت مصباح وأغلقت باب الغرفة...لا تستطيع رؤية الضوء خلال الجدران..

طبعا كلام جميل..لكن كعادة علماء الفيزياء دائما....
إجابات العامة على أسئلة من النوع ده بيكون تقديرها كده

تعالوا نشوف البهوات دول يجاوبوها إزاى

علشان إشعاع كهرومغناطيسى يمر من حاجز أمامه...يتحكم فى المسألة دى عوامل كثير أهمها:
1- الطول الموجى للإشعاع
2- كثافة الإشعاع
3- التركيب الكيميائى للحاجز
4- التركيب الفيزيائى للحاجز
5- سمك الحاجز

علشان نفهم الحكاية دى تخيل إنك وقفت فيل بجوار نملة!
النملة مش شايفة الفيل على بعضه...يعنى يدوب شايفه مقطع عملاق منه!
والفيل كمان مش شايف النملة خالص!

آه...يبقى موجات جاما..طاقتها عالية قوى..تخترق الجدار زى الطلقة!
وموجات الراديو ترددها بطــــــئ...وطاقتها ضعيفة..تخترق الجدار أيضا دون أن يحس بها
أما الضوء بقى...فطاقته ليست بالقوة الكافية حتى يخترق كالطلقة!
وكمان فيه شوية نشاط..يجعلوا الحاجز يكتشف الضوء ويعرقل مروره!

هناك معادلة شهيرة للعالم شرودنجر
بيفترض فيها...جزئ بكتلة معينة ينتقل عبر حاجز أبعاده س مثلا وفرق الطاقة الكامنة بين طرفى الحاجز معروف

المهم من المعادلة دى شرودنجر بيقولنا
والله الإنسان كجسيم برده ممكن يخترق الحائط!
لكن المشكلة اللى حتوجهنا فى المعادلة إن كتلة الإنسان كبيرة قوى قوى
وبالتالى إحتمالية الإختراق ضئيلة جدا جدا جدا
نقول مثلا 1 من مليون!

يبقى يا إما نضرب عبده حريقة فى الحائط مليون مرة...ممكن يعدى مرة واحدة بس!!
أو نجيب مليون عبده حريقة ونضربهم فى الحائط مرة واحدة
وبرده واحد بس اللى حيعدى!!

إيه يا عم شرودنجر اللى إنت بتقوله ده
صحيح الفيزيائيين فى نعيم

فى أمان الله

ياترى مين أول واحد إتكلم عن مبدأ النسبية؟

22- ياترى مين أول واحد إتكلم عن مبدأ النسبية؟

دى صورة عالم الرياضيات الفرنسى الشهير هنرى بوانكريه (1854-1912)..Jules Henri Poincare

هذا الرجل كان رياضى من درجة الأولى وله إسهامات عديدة فى مجال الرياضة والفيزياء النظرية...لعل أشهرها مبدأ النسبية

العالم ده فكر...يا ترى لو أنا فى غرفة النوم وأثناء نومى...فجأة كل حاجة فى الكون زاد حجمها ولنقل مثلا ألف مرة....حد ممكن يكتشف التغيير ده؟

الإجابة إن تقريبا مستحيل نقدر نكتشف الحكاية دى خالص بأى وسيلة قياس!
لإنك حجمك حيزيد ألف مرة وكل شئ حولك برده حيزيد ألف مرة!
المسافة بين شغلك وبيتك حتزيد ألف مرة.......
لكن لا تنسى إن جسمك حيزيد ألف مرة....يعنى لو بتمشى لشغلك...خطوتك حتزيد ألف مرة....وعقارب الساعة حتزيد ألف مرة...وبالتالى الزمن سيظل من وجهة نظرك (من وحدة قياسك..الساعة يعنى)...كما كان!!
مع إنه زاد ألف مرة!!

كمان جاذبية الأرض حتزيد ألف مرة...وكتلتها حتزيد ألف مرة...لكن عضلاتك كشخص زادتك أيضا ألف مرة...وبالتالى قلبك وأعضاءك حتتعايش مع الأمر وكأن شيئا لم يكن!!
لإن حتى بيولوجيا لن تستطيع إدراك الحقيقة!
صحيح النملة زادت ألف مرة فى الحجم...لكن لم تصبح فيل فى نظرك!!

ببساطة لإن حدقة عينيك زادت هى كمان ألف مرة.....فلو قارنت النملة مع من حولها ستظل النملة نملة...ويظل الفيل فيل!!
مواء القطة على ضعفه!...لو زاد ألف مرة لن يصير مثلا كزئير الأسد!!
لإن أذنيك زادت ألف مرة...

المسافات الكونية حتزيد ألف مرة......لكن قدرة تليسكوباتك وسعتها القياسية حتزيد أيضا ألف مرة!
يعنى لو الشمس على بعد وحدة فلكية...ستظل على بعد وحدة فلكية أيضا
مع إنها زادت بمعامل ألف!

طيب نعرف إزاى يا عم بوانكريه إن الكون زاد؟
هى ببساطة شديدة المسألة نسبية!
يعنى طول مأنت فى الكون ده...مستحيل تعرف!
لازم تخرج خارج الكون وتراقبه من إطار حركى آخر!

ودى فكرة الأطر المرجعية فى النسبية الخاصة لإينشتين.
يعنى فى تجربة التوأم مثلا!!
الأخين كل واحد فى إطار مختلف تماما عن الآخر!

ومع إن الأبعاد تقلصت..والزمن تمدد على الأخ المسافر...إلا إنه لا يشعر بذلك!
إنما يشعر بذلك من يراقبه من إطار آخر ثابت!

يعنى المسافر يتخيل إطار الثابت زاد ألف مرة عن إطاره!
والثابت يتخيل إطار المسافر أقل ألف مرة!!
فى حين إن كل واحد شايف إطاره لم يحدث فيه أى تغيير!!

مسألة نسبية بحتة
فى أمان الله

هو ليه الإلكترونات تدور بسرعة هائلة حول النواة(تكاد تقترب من سرعة الضوء)؟

21- سؤال خفيف كده من ميكانيكا الكم
هو ليه الإلكترونات تدور بسرعة هائلة حول
النواة(تكاد تقترب من سرعة الضوء)؟

هو بما إن الإلكترونات جسيمات مشحونة..تحمل شحنة سالبة..ده معناه إنها تكتسب تسارع فى المجال الكهربى!
وبما إن كتلة الإلكترون صغيرة جدا جدا (لإنه جسيم أولى أساسى غير قابل للإنقسام)....يبقى أقل قوة كهربية ممكن تؤثر على الإلكترون..تكسبه تسارع هائل!
يمكن بلغة الأرقام تكون أوضح
كتلة الإلكترون تقريبا= 9.10938*10^31- كيلوجرام!
وهناك معادلة شهيرة لحساب تسارع الإلكترون حسب الطاقة اللى يكتسبها:

V=(2e/m) ^-1/2

وطبعا واضح جدا من المعادلة إن قيمة m صغيرة جدا جدا...وبالتالى V عالية جدا...وكل تغير طفيف فى E ينشأ عنه تغير وتسارع ضخم فى قيمة v

يبقى من المعادلة البسيطة جدا دى منستعجبش إن المكالمات التليفونية أو التلجراف أو سير الكهرباء فى أسلاك الضغط العالى...يتم بسرعة عالية جدا...لإننا من البداية أكسبنا الإلكترونات فى محطات القوى فرق جهد وطاقة حركة عالية أدت بها إلى التسارع

ده كمان المعادلة فيها شئ هام جدا!
علشان نخلى الإلكترون يتخطى سرعة الضوء...محتاجين طاقة كبيرة جدا جدا....أكبر من أى إنفجار سوبرنوفا أو إنفجار جاما تم رصده فى الكون حتى الآن!!

حد يعرف يعنى إيه.... تأثير كاسيمر؟

20- حد يعرف يعنى إيه....
تأثير كاسيمر؟

ده تأثير كمى إفترضه الفيزيائى الدانماركى...هندريك كاسيمر
الفكرة ببساطة وضع لوحيين معدنيين على مسافة قريبة جدا من بعض...وبالتالى حيكونوا عاكسين للفوتونات بينهم...بما فى ذلك الفوتونات الإفتراضية!

ولكن بما إننا قللنا المسافة بين اللوحين...يبقى حددنا أطوال موجية معينة فقط بينهم...فى حين إن خارجهم كل الأطوال الموجية متاحة.
يمكن الصورة دى توضح فكرة كاسيمر

الفراغ بين لوحى كاسيمر يسمح فقط بوجود الفوتونات ذات التردد الأسود
فى حين على السطح الخارجى للوحين كل الترددات متاحة

يبقى كده فيه قدر من الطاقة غير موجود بين اللوحين....يعنى دفع الفوتونات من الخارج أكثر من دفعهم من الداخل...وده يؤدى إلى تقارب اللوحين!!
ويمكن حساب أيضا مقدار القوة المبذولة على اللوحين.

الفوتونات الإفتراضية هى فوتونات تظهر وتختفى فى الفراغ الكمى...يعنى بما إن الكون لم يصرف أى طاقة فى تكوينها فما تلبث أن تظهر حتى تختفى!!

أقرب مثال لكده لما بيحصل تصادم فى المعجلات النووية بين البروتونات لتكوين البيونات.
لازم نفهم إن البيونات ليست حطام وأشلاء للبروتونات!
لا ده لما البروتونات تتصادم...تفقد جزء من طاقة حركتها..الجزء المفقود ده يتحول إلى جسيم حقيقى ملموس هو البيون!
طبعا اللى يحكم القصة دى E=mc^2

آه يبقى فى تجربة كاسيمر لازم أعطى اللوح طاقة علشان يكون فوتونات يعنى يشع ضوء!!
نظريا لو اللوح ترك ليسقط سقوط حر...حرارة الإشعاع المنبعث منه 4*10^30- كلفن!!
وبما إن الضوء المرئى حرارته حوالى 6000 درجة كلفن....يبقى محتاجين نحرك اللوح بتسارع يكاد يقترب من سرعة الضوء!!

يا ترى على إرتفاع كام تقتدر تشوف الكرة الأرضية كلها؟

19- وإنت راكب طائرة....تقدر تشوف جزء كبير جدا من الأرض
وكل ما ترتفع أكثر....تشوف أكثر!
يا ترى على إرتفاع كام تقتدر تشوف الكرة الأرضية كلها؟

السلام عليكم ورحمة الله جميعا
سؤال جال بخاطرى فجأة وبحثت عن إجابته فوجدتها ووضعتها هنا

قبل الإجابة نعتبر الأرض كرة متماثلة من جميع الإتجاهات
(يعنى نلغى تأثير تضاريس الأرض)

يبقى كده نخلص للحقائق الآتية:
1- مش مهم إحنا حنراقب الأرض من أى مكان...يعنى مش حتفرق من أى خطوط عرض...قطبية أو إستوائية!
لإن الكرة كشكل هندسى متماثلة من جميع الإتجاهات

2- مستحيل نشوف الكرة الأرضية كاملة!
لإن نصفها سيظل مخفى فى الإتجاه الآخر...تمام كده
يبقى أقصى ما يمكن تتمنى أن تراه هو نصف الكرة الأرضية.

3- كمان عمرك متشوف نصف الكرة كامل!!
لإنك يدوب حتشوف قرص الأرض عبارة عن دائرة..إنما الحواف المطوية حول هذه الدائرة مستحيل نشوفها

فيه معادلة رياضية لطيفة جدا..خاصة بالجزء اللى ممكن تشوفه من الكرة كلما إبتعدت عنها
F=H/(H+R
حيث f هى الجزء المرئى fraction
H هى المسافة بينك وبين الكرة...الأرض يعنى
R هى نصف قطر الكرة

يبقى فى المعادلة لو إرتفعنا مسافة قد نصف قطر الأرض حنشوف فقط نصف الجزء المواجه لنا من الأرضّ

نصف قطر الأرض حوالى 6370 كيلومتر
لو إرتفعنا 400 ألف كيلومتر..حنشوف 98.4 % من النصف المواجه لنا!

النسبة دى كافية!
ولا عايزين تشوفه أكثر!

أصل كل ما قيمة H تزيد..تزيد معاها قيمة F
ولكنها تظل دائما أقل من 100%!!!
يعنى ممكن تبقى كده
0.9999999999999999998
آه كده وصلت
يبقى لو عايزين نشوف القرص المواجه لنا كله
نذهب إلى مالانهاية!
بقول إيه
كفاية عليكم 98.9 % تمام قوى!

بس فيه مقولة شائعة قوى!
القمر يواجه الأرض بنصفه دائما!
هو إحنا بنشوف نصفه بالظبط؟!

سؤال كوميدى آخر!!! هى ليه السماء شديدة الظلمة ليلا؟

18- سؤال كوميدى آخر!!!
هى ليه السماء شديدة الظلمة ليلا؟

السلام عليكم ورحمة الله وبركاته
عودة بعد غيبة مع سؤال واقعى جدا..ليه يعنى الدنيا تبقى بالليل حالكة السواد؟

الإجابة السريعة جدا إنه علشان فى الليل تكون الشمس مقابلة للوجه الآخر من الأرض!....بس دى إجابة غير مرضية بالمرة

تعالوا نخلى السؤال علمى أكثر...ليه الكون مظلم؟

من زمان والعلماء فكروا على النحو التالى...لو كان الكون محدود ولو كان الكون ممتلئ عن آخره بالنجوم...يبقى لازم فى كل بقعة تقع عينك عليها تلاقى نجوم...ويبقى لازم السماء تكون براقة ....دى إسمها مفارقة أولبرز ومعروفة من سنة 1826

فى علماء وضعوا إجابة للسؤال..وقالوا
والله بما إن النجوم دى بعيدة قوى يبقى شعاع الضوء القادم من النجوم البعيدة تمتصه المادة بين النجوم وبالتالى يقل طاقته ..فلا يتلألأ ليل السماء!

بس الإجابة دى رد عليها علماء آخرين!!
مهو لو كانت المادة البين نجمية تمتص طاقة الفوتونات بإستمرار..يبقى أكيد حيجى وقت وتسخن وتشع هى كمان ضوء!
يبقى يا ترى عمر الكون كبير بالدرجة اللى تخلى المادة البين نجمية تشع..ولا لسه عمر الكون لم يصل لهذه الدرجة؟

فيه علماء ثانية فكرت فى الإجابة بطريقة ألئم:
هو مش شدة شعاع الضوء بتقل مع مربع بعده عننا...يبقى أكيد فيه نجوم بعيد بعيد...بس ضوءها خافت جدا...فلا نراها...وبدل من ذلك نرى بقى سوداء فى السماء...بغض النظر بقى عن عمر الكون سخن أم لم يسخن!!

إنما أيضا فيه علماء ردوا عليهم رد يغيظ!....وقالوا
يعنى يا بهوات لو كان الكون محدود...يبقى كثافته ثابتة.....تمام
يبقى كل ما نبعد...آه النجوم البعيدة أخفت...إنما فيه حاجة!!
كل ما نبعد...كل ما المخروط الضوئى...أو الشريحة المرئية من الكون...يبقى فيها عدد نجوم أكبر!!
وزيادة عدد النجوم مع المسافة حتعوض ضعف ضوءها!
يبقى المفروض إن الكون يكون مضئ

عارفين إجابة السؤال ده لم تنتهى إلا بالتخلى عن فكرة إن الكون محدود!!
يعنى فى نموذج الإنفجار العظيم وفكرة تمدد الكون...نسيج الكون نفسه يتسع..وبالتالى زى مقولنا قبل كده لا يعطى فرصة للفضاء إنه يسخن لدرجة التوهج...لإن الفوضى لم تصل لنهايتها القصوى بعد..والإتزان الحرارى لم يحدث بعد....
وكل ما ترتفع درجة حرارة جزء من الكون...يرجع يبرد بالتمدد..

يااه يعنى تمدد الكون هو السبب إن الدنيا حالكة السواد بالليل!!
إجابة بعيدة تماما عما قد يدور بالأذهان!!

ولعل السؤال الواجب سؤاله الآن:
هى ليه الدنيا بقى منورة بالنهار؟

الإجابة المرة دى أسهل...طبعا نتيجة تشتت الأشعة الصادرة من الشمس فى طبقات الغلاف الجوى وجزيئاته...فيتم إمتصاص معظم نطاق الضوء المرئى وينفذ النطاق الأزرق...فنلاقى السماء بلونها الأزرق الفاتح نهارا

مفارقة أولبرز...لو الكون كله نجوم بكثافة ثابتة
يبقى لازم ليل السماء يكون براق



الشريحة الأبعد فى الكون فيها نجوم أكثر خفوتا
ولكنها...أكثر عددا أيضا!!

فى أمان الله

موضوع هام جدا فى الفيزياء يعنى إيه إنتروبيا

17- سؤال آخر لموضوع هام جدا فى الفيزياء
يعنى إيه إنتروبيا

----------------------------------------------------------------------

الحقيقة إنتروبيا دى هى الترجمة الحرفية للمصطلح Entropy
,احيانا يذكروها فى بعض الكتب على إنها الفوضى!!

كلنا عارفين إن الهواء ينتقل من مناطق الضغط الأعلى إلى مناطق الضغط الأقل....كمان الحرارة تنتقل من الأعلى للأقل...
يعنى لو وضعت كوب من الشاى فى غرفة معزولة يحدث إن الكوب يفقد جزء من حرارته....وبالتالى ترتفع حرارة الغرفة ويقل حرارة الكوب..حتى نصل إلى التعادل
طيب هو التعادل ده معناه إن تبادل الحرارة وقف؟
لا أبدا..مازال هناك تبادل حرارة..بس متساوى بين الطرفين...
يعنى كوب الشاى يطلق حرارة فى الغرفة مساوية للحرارة التى يمتصها من الغرفة
وهنا يقال إن كوب الشاى سبب أكبر قدر من الفوضى فى الغرفة فقط عندما وصل إلى مرحلة الإتزان الحرارى مع الغرفة!!

علماء الكونيات طبقوا القانون ده...القانون الثانى للديناميكا الحرارية
على الكون بوجه عام....وإكتشفوا إن كل التفاعلات والعمليات الكونية ترفع من درجة الإنتروبيا فى الكون....
يعنى فى حاجة إسمها سهم الفوضى (الإنتروبيا)....تماما زى سهم الزمن!!

يعنى مثلما لا نستطيع الرجوع بالزمن للوراء....لا نستطيع أيضا الرجوع بالإنتروبيا الكونية لمستويات أقل!!
مينفعش تأخذ الحرارة من الغرفة وترجعها لكوب الشاى!!
لازم الإنتروبيا تزيد بإستمرار

نضرب مثال مثلا على حسام حبيب قلبى بما إنه فى قطاع البترول.
قطاع البترول ده أكثر ناس تزود الإنتروبيا على كوكب الأرض!!
يعنى لتر البنزين مثلا عبارة عن طاقة متجمدة فى حيز محدود من المادة...لما نستهلكه فى السيارة..الطاقة دى تتحول لطاقة حركة فى السيارة وطاقة حرارية وعادم. ينتشر فى الفضاء....
الطاقة الحرارية ترفع حرارة النظام...والعادم أدخل مركبات جديدة على النظام.....يبقى الإنتروبيا زادت!

لو قيسناها على المستوى الكونى...كل نجم (طاقة متجمدة)...يشع للفضاء حرارة هائلة فيزيد من الإنتروبيا...ومازال هناك نجوم تشع ولم يستهلك الكون كل نجومه!
يعنى لسه الإنتروبيا فى إزدياد ولم نصل للإتزان....
لما نوصل للإتزان حيكون الكون إستهلك كل الطاقة الممكنة فيه...
يبقى كل نجم يأخذ من الفضاء حوله طاقة مساوية للطاقة التى يشعها...
وهنا يقال:
إن الكون إتزن حراريا.....أو مات حراريا
وتتوقف كل الأنشطة الحيوية والفيزيائية

فى أمان الله

سؤال اليوم قد يبدو كوميدى!! ....لماذا لا يتعب الضوء؟

السلام عليكم ورحمة الله وبركاته
الحقيقة اللى أوحى للعبد لله السؤال موضوع فى قسم المالتيميديا عنوانه:

The Known Universe

آخر الموضوع كان فيه السؤال ده:
كيف ما فقد قوته؟

صحيح ليه الضوء لا يفقد قوته...أو لماذا لا يتعب؟
أنا لو معايا كشاف فى إيدى...درجة بريقه حتكون أقوى من الشعرى اليمانية ألمع نجم فى السماء على الإطلاق. إنما كلما بعدت عن الكشاف قل بريقه...
نقول بعدت 20 كيلو مثلا فى ليلة حالكة السواد...مازلت أرى ضوء الكشاف كنقطة......طيب نبعد أكثر فأكثر!
أقولكم.....إيه رأيكم نركب منطاد ونراقب ضوء الكشاف...أو نوصى حد من المحطة الفضائية الدولية لرصده!!
برده حيشوفه بس نقطة صغيرة خالص.
طيب تعالوا نبعد أكثر....على القمر مثلا!
هنا مستحيل نرصده بالعين المجردة...إنما بالتليسكوبات سهل جدا رصد ضوءه.
الله...يعنى شعاع ضوء الكشاف ممكن يروح لآخر مكان فى الكون؟
الجواب ...نعم يذهب لآخر بقعة فى الكون.!!
أصل الفكرة عن الضوء عبارة عن فوتونات...والفوتون له خاصيتين عجيبتين جدا:
1- لا كتلة له.
2- لا يشعر بالزمن!
من قوانين الفيزياء إن أى جسم له كتلة ثبات Rest Mass لو أنا عايز أسرع الجسم ده....يعنى أسبب له عجلة أو تسارع Acceleration ...يبقى لازم أبذل عليه شغل أو طاقة.....وكل ما زادت الطاقة دى كل مازاد قدرة الجسم على التسارع....
يعنى السيارة اللى قوتها 50 حصان...تتسارع فى زمن أقل من تسارع الحمار الحصاوى......وكمان السيارة ال100 حصان تتسارع فى زمن أقل.

طيب تعالوا نثبت الحصان ونغير وزن السيارة!!
يعنى السيارة السبور الخفيفة...لو بذلت عليها 100 حصان..أكيد حتتسارع فى زمن أقل من السيارة النقل مثلا!!

آه...يبقى هنا فيه حاجة إسمها كتلة القصور الذاتى للجسم!!
يعنى كل ميكون الجسم له كتلة أكبر..كل ما يقاوم الحركة بشكل أكبر.

تعالوا بقى للفوتون......ليس له كتلة بالمرة!!
علشان كده يدوب يطلع من البطارية بس....ويتهادى فى الكون كله بمزاجه!!
أصل مفيش له كتلة قصور ذاتى تمنعه من إنه يتحرك!

إنما مثلا جسيم زى البروتون!....له كتلة بس قليلة جدا جدا جدا....
آه يتسارع وبشكل كبير جدا .....إنما كتلة القصور الذاتى بتزيد كل مازادت سرعته!!
يعنى لو وصل لسرعة 99.99999 من سرعة الضوء!
كتلة القصور الذاتى تفرمله وتخليه يبطأ....بحيث لا يصل لسرعة الضوء أبدا!

علشان كده سرعة الضوء سقف أعلى للسرعات الكونية....
عايز توصلها.....تستغنى عن كتلتك!

من جهة أخرى..الإحساس بالزمن أو التغير فى المكان بنحس بيه لإن سرعاتنا بسيطة....
أما الفوتون زمنه متجمد.....يعنى ممكن يدور الكون كله فى نفس اللحظة...وعنده إحساس إنه ثابت فى مكانه!!!

يبقى الضوء لا يشعر أبدا بالتعب....قد يقل كثافة الضوء كلما بعدنا عن المصدر فلانراه!!......ولكن فوتوناته تظل موجودة غير مرصودة لنا